الشاعر / الجيلاني بوخريص المقرحي

مكان فيه ما نرتاح ما نمشيله

الشاعر / الجيلاني بوخريص المقرحي

مكان فيه ما نرتاح ما نمشيله		واللِّي ما يحسّ بداي ما نشكيله
مكان ما يريِّح بالي		ما نجيه له قلّتْ الجي أولالي
ولا نشتكي لكل حدّ بحالي		كان غير من قاتل جراير سيله
وعارفه يحسّ وعارفه يصغالي		انجيه في جنينه قاصده وانشيله
هذاك من ضيقة بياد احبالي		يمكن بما في خاطري نحكيله
وسِرِّي اللِّي ما ينعطى لعيالي		عليه نمَّنَه كيف الوطا الثقيله
صاحب أولى من خوي قدره عالي		عليّ احترامه فرض بمفاعيله
مكان فيه ما انْتَهَنَّى		ما نجيه لين ينوّضوني منَّه
وصبري على دايا دواء نلقنَّه		خير من انشاكي بيه ناس رذيله
ولا انصاحب اللِّى كانهن واتنَّه		ليَّام ينسى قبل ما صَارِيله
يكره الماضي والتحدَّث عنَّه		ويُنْكر أصحابه من عدم لاصيله
التافه أفَّام الناس ما يطرنَّه		كان بالاقلابه والعوج والحيله
لو نموت ما نقبلش قوت اثنَّى		عليَّ ولا يمكن انشيل جميله
نفسي ورفع الشوف عندي هنَّه		أساس الحياة ما غيرهن نرعيله
شديد عزم والعازات ماهزنَّه		كياني جبل رغم الزمان وميله
صدق منو قايل مثل يقعد سنَّه		اللِّي يشبحك بالعين ما توميله
بلا شرح تفسير الكلام انظنَّه		واضح ولا لي خوف من تأويله
مكان نكره من لوَّل		ما نجيه لا عنَّه يقولوا حَوَّل
مجرِّب وناظر شوق هول مهوَّل		على صغر سنِّي الدهر ضايق ويله
جايل ومتحدِّث مع متجوِّل		وسامع محاكي من اسنين طويله
رفيق يوم عمرك ما عليه تعوِّل		ولا تقول صاحب بين يوم وليله
ولا قوت صاحب ساهله اتأوَّل		الصاحب مع الصاحب يغيرن خيله
يموت بينهم ويرِيِحْ مهما طوَّل		ولا سر مَيِّتْهُمْ يبان دليله
مكان فيه يُنْقَصْ قدري		ما انجيه لو يبدا ضناي البدري
ولا لكل حد نحكي اللِّي في صدري		هو الدهر ولاَّد الغريب تبيله
ولا لمنو يكرهني انْبَيِّنْ كَدْرِي		لين فيِّ يِشْفِي باللسان غليله
نصبر وخالقني بحالي يدري		والضيق الفرج من غير شكّ بديله
مكان بَاينَاتْ عيوبه		له ما انجي مالي ومال اقروبه
مراعي بداي وعارفه المكتوبه		علي الحيّ قطع الشكّ بتجريله
كان قلت كلمة كلمتي محسوبه		بلا حِكَمْ كُثْرَ الشعر من يصغيله
تعلَّمت من شاعر بليغ أسلوبه		كيف القوافي لظمهن تشكيله
دكَّام والمنهل عليه ادروبه		يدلَّن وهو في القول سيد عزيله
مكان فيه ما ناجدها		راحتي دقيقة فيه ما نقعدها
ولا كلّ كلمة عابرة انعاودها		الخَفَّه مَزَلَّه وقوت قال نطيله
ولا يَشَهْدُنِي في بَيِّنَه نجحدها		عارف وراي حسيب ومولِّيله
وكل حد ليه اطباع واتْحَدِّدْهَا		كلمة الْمَنْ والثامرة لاصيله