قصيدة في مدح الاجواد...للشاعر ادريس بوحويش

وينما يضيق الحال **لجواد يفزعولك موش كي لنذال ** تلقاهم سند ************************* وينما يميل زمانك ** ويجيك شي واعرموش في حسبانك

خلا مع ربك شديد ايمانك ** امغير اطلبة فكاك كل اوحال حتي لو جميع الناس جو عدوانك ** ولك بيتوه الشر باي افعال امفيت بامر ربي ما يواطو شانك ** ولا يلحقك منهم عمل بطال ونكان هم نووك بخير وان هوانك ** مايجيك غير مراد ذو الجلال بلاه ما بحاجة ينفعوك اعوانك ** لو اعزومهم تمن اعزوم اجمال و خلك عفيف يكون فوق مكانك ** واللي لك نصيب تجيك باي اشكال ولا تتخذ بعض العرب حبانك ** الا نين تدرسم بوسعة بال اوقات العوج ياتيك من خلانك ** اللي قبل عندك كي اولاد هلال وفعلك مع لاخرين هو عنوانك ** اللي ينعطا للي عليك يسال ونكان بحتبه سرك ابنطق لسانك ** لا تلوم والي وينما ينقال لسانك يقولو راه كيف احصانك ** انصنته يصونك والثنا ينشال ونكان انت هنته فالمحاضر هانك ** ايواطي بوجهك صيت شين تنال وميط مالخلايق وانت فيهم مانك ** زارع سوايا يكرهوك اتنال اعدا من وراك وكان جيت اقرانك ** وبأول ثمن باعوك للدلال وفيهم اجواد يثقلو ميزانك ** وماتهزهم شي ريح كي لجبال انجوك تنفرج تفرح تزول احزانك ** وغيابهم عليك ايديرلك مشغال

*************************** وينما تجيك شدايد ** ويجيك الزمان بشي مانك رايد عليك ينزوي مامن ارباة لمايد ** اللي في الرخا صاحب ولك بجال يبان عالحقيقة كي الحبل البايد ** اللي كي تعوزة مايسد غلال جفاه خير من قربه قليل افوايد ** ولاعد عليه انكان جاك تسال وايهفن عليك وجوه ناس جوايد ** اللي للغريب احماه ما يندال حتي وحيلهم حطن عليه لحايد ** الدار مي خراب مخلفين ارجال كيف الربيع يقابلو فالرايد ** اللي في سنين معجرفات اكلال بلا قول ديره كيد كل مكايد ** معاك يفزعوا وقتن ايسير اشكال يصابو معاك وللكسور ضمايد ** حتي من اتعافه للعقد حلال لجواد ربنا ديما عليهم جايد ** ويجودو بمو جايد اصحاب افضال ونجابو علل تلقاه بالك صايد ** ونجالستم تنسي نصيب اهوال حتي لو ثناهم نرفعه بقصايد ** ناقص ابقولي حقهم مازال

**************************** وينما تجيك اصعاب ** ويجيك الزمان بلون كي لغراب اما بقل مال يديرلك شخشاب ** والا ظلم جاير من عرب جهال والا مرض واطلاب من طباب ** ماهن معاك وصعبات منال يجيبلك المولي هل عناه وقاب ** اشراف اصل شيالة احمول اثقال امعاك يفزعوا ديما لكل ابواب ** مفتاح خير ما يعصن عليه اقفال معاهم اطامن فص ملح وذاب ** الفاهق اللي ما جا عليه اخلال لجواد للبعيدة يحسبو فاحساب ** بعيد بوعهم عالذيل والهزقال اينالو انزابوهم امغير اتعاب ** بورة ضنا لجواد ما تنطال لجواد زينهم ما هو لصيف سراب ** وينما عليه الشمس غابت زال ولاربيعهم يثر عليه اجداب ** لجواد خيرهم عاشن عليه اجيال ويعاطو بلا منه اللي طلاب** وفي بيوتم راحة اللي رحال للخير دوم جاعلهم الله اسباب ** ابعاد المواجع عامرين الجال لجواد برفقهم لك شرف تنهاب ** والقعدة معاهم تنشرا بالمال حتي صغيرهم بللي لفا رحاب ** يمتاز بالكرم وبحسن لستقبال امعاك انتحدث في حديثه صاب ** من خلفة اولاد هلال جاب امثال وذيول العرب مالهم فخر ينجاب ** ولا ينهضوك انكان وقتك مال ولاعندهم تلقا اهناك اصحاب ** ولا مالحرام يفرزو الحلال حتي ضناهم كيفم ذهاب ** امع كل خاطم يطلقو مشعال جراد منتشر فالوطن عال خراب ** مع كل خاطم يطلقو مشعال عليشان خزرة حيطهم يداب ** ويبقي نهار اسود اتقول كحال وسيوف وسناقي يجبدو طياب ** علي ادني سبايب كل يوم اقتال مع كل شارع جايين اسراب ** شينة الغاه وقول قيل وقال نشيش وحشيش وكل نوع شراب ** وسرقة ولسنه عالعباد طوال لا اصغار يحترمو ولا شياب ** ولا لهم علي طرقة الخير اقبال كي غيبة القانون عنهم غاب ** اللي ايعنهم عالعيب مالعقال وختام العلل طالب اللي وهاب ** اللي في البحر للحوت دار اوكال ايرد الطريقه من طريقه ساب ** وايبدل كداه اللي كدي بدلال

**************************** وينما يضيق الحال **لجواد يفزعولك موش كي لنذال ** تلقاهم سند